decimu quintu día

0757 depués d'apagar el pitu entro na ferretería.
0800 salí del vestuariu, dexé la bolsa cagüeñera qu'identifica a la mocedá comprometía y con ganes d'una selmana per xixón de folixa nocherniega y cursos peles mañanes.
0801 garré l'aspiradora, alcuérdome de que depués d'aspirar he pasar la maquina llavadora, o fregadora, que yá ta iguada.
0915 depués d'aspirar y fregar entamo colos palés. baxa, descarga, cuenta, revisa, carga, coloca.
1200 saca les bolses de basoria, el camión lleva cuatro díes ensin pasar, fai calor, fedor.
1215 fraga sacó más votos. el psdg y el bng sacaron más votos que fraga. entovía queda'l votu de la emigración galega. n'asturies nun sé si esi votu existe. espero que en galiza tamién gobierne'l bloque, como n'asturies. hai diferencies, na galiza sábense país, n'asturies nun sabemos que somos, llueu quiciavis nun existamos. alcuérdome de les grandes conexones históriques y de pensamientu asturianes y gallegues. n'asturies nun tuvimos una rosalía de castro, tampoco un castelao; igual sí pero nun fuimos tan románticos, lo de nueso yera'l naturalismu. asina mos va, ensin suaños de futuru.
1300 salgo y echo'l pitu.
1500 yá xinté, yá fumé y vuelvo a la xera.
1600 coloco delles coses peles estanteríes, echo gabitos acullá.
1700 sigo colos palés. esta fin de selmana hebo cumal de la unión europea, asturies nun va tener fondos europeos, ye que la cosa va bien y los problemes d'asturies son lleendes urbanes. dicen que nes termes del campu valdés nerón toca l'arpa toles nueches, suañando que ye como augusto y diciendo querer ser marco aurelio; quedóse en fiu de marco aurelio col so gustu polos xuegos.
1730 l'uviéu ganó n'ávila. uviéu tien un acueductu, pequeñu, ávila tien otru acueductu más grande. el d'uviéu ficéronlu los y les uvieínes, el d'ávila ficiéronlu los y les romanes. teníen sede.
1800 llega un palé. ye d'ayerbe, un pueblu vascu (ta en nafarroa, cerca d'aragón) alcuérdome d'o chuicio d'ayerbe. la llingua aragonesa ta morriendo, sele. muerre aragón ensin agua. quieren llevala pa facer campos de golf y agricultures de regadíu. nun s'alcuerden de los cuentagotes. nun miren lo que tienen.
1915 voi por maria antonieta, un cuartu d'hora y yá voi pa casa.
toi cansáu. echo'l pitu. escribo. duermo. la fin de selmana mar y yo volvimos ser los primeros nel trivial públicu de cabrales. agora toca volver cada poco a renovar y aumentar el record.
ávila nun tien acueductu. segovia y uviéu sí. ávila dicen que si nun existiera nun diba pasar nada porque naide nun s'alcuerda d'ella, ye como teruel que naide nun s'alcuerda de qu'existe; sicasí n'ávila, teruel y n'uviéu vive xente; y munchos tienen problemes asemeyaos.