vixésimu día

0800 depués d'apagar el pitu tusir un cachu entro pa dir directu pola aspiradora. ayeri alcontrara un accesoriu que diba permitir abandonar la peregrinación de rodielles per tola tienda, calculo que con estos díes llimpiando de rodielles algamé indulxencies pa unos venti años. nestos próximos venti años voi poder facer lo que me dea pola real gana que bona ye la ilesia católica.
0900 sigo pensando en tolo que voi poder facer, sabiendo que yá toi perdonáu y qu'esos años nun cuenten a la hora del xuiciu. llega un palé y póngome con él el conteníu nun ye interesante y poro nun voi falar d'elli. la cosa llevó muncho tiempu.
1230 interesante nada pero llargo y difícil de cuntar, nun vos quiero nin cuntar. sigo, seguí, pensando no de les indulxencies, esa capacidá de perdón qu'ufre la ilesia católica apostólica y romana anticipada a la comisión del delitu. y nada qu'agora que tengo toda esa llibertá más que saltame les más conocíes como comer carne en cuaresma y dir a misa los domingos nun se m'ocurre nenguna otra.
1307 salgo, prendo'l pitu y pa casa. el trabayu va faciéndose monótonu.
1500 fae sol, fae muncho calor, quiero tar na cama echando un pigazu. toi pensando en que depués voi xubir a uviéu a tomar una cerveza, lleer la prensa y charrar un ratu colos/es collacies. les conversaciones en trabayu, amás de rápides, son nun sé si emplegar la pallabra que ye pueril. ayer españaren bombes en london naide faló nada d'ello, entrugué-y a un sobre la tema pa ver si polo menos taba enteráu, sabíalo pero yera como si nun significara nada pa elli.
1600 torniellos, piedres y palos. la fabrica ocupá hai que trabayar. palés de torniellos a media d'una tonelada métrica cada un d'ellos (pongo lo de la tonelada métrica pa que nun haya confusiones cola tonelada imperial). clasifícolos y los cuento. sigo colo de london y l'interés de la xente polo que realmente condiciona la so existencia.que'l real uviéu suba a segunda b tien un importancia pa la nuesa subsistencia tala que nun podríemos dir a trabayar de l'alegrua o disgustu que pudieremos tener. que cincuenta persones muerran en london y otres cincuenta en basora a consecuencia d'acciones armaes y que les bolses y el petroléu se desplomen sí va condicionar la nuesa existencia. que se saque a los milicos a controlar les estaciones de tren y autobus, que s'impongan más controles a la ciudadanía sí condiciona la nuesa existencia. dicen que vivimos nuna sociedá democrática cuando en realidá vivimos nuna sociedá apantallada y aletargada, qu'escaez, y cambia, la so realidá y les ganes de cambiala pa meyor por noventa minutos viendo a venticinco persones correr per un prau dando-y golpes a un balón fechu por un neñu o neña de singapur, que trabaya esclavizáu diecisiete hores al día por una migayina d'arroz.
1900 voi acabando. ana rosa cambio la forma de peinase, ta más guapa.
1930 salgo corriendo que voi pa uviéu. me marcho pa oviedo, me voy pa la city... cantaba un grupu que ganara'l concursu de maquetes de los cuarenta va unos años. ta mañana. besos y abrazos que güei siéntome bien.