vixésimu sestu día

la perguapa voz de nico acompáñame de la qu'escribo estes llinies, la femme fatale que tou'l mundu conoz.
0705 llevántome sintiendo'l tiempu na radio como faigo davezu, pienso qu'un día d'estos voi dexar de facelo porque hai que dicir que cuando dicen que va llover nun llueve y cuando dicen que va facer sol fae sol y cola seca qu'hai ye pernecesario que llueva.
0743 salgo de casa, pienso nel vienres a les 1930 cuando salga, la cosa ye que tamos a llunes...
0800 si hai ceniceros úsalos, la xente ye de lo que nun hai ven un ceniceru y como nun tan en casa por si acasu nun lu usen nun vaya ser que s'empuerque. tengo ganes, y eso que soi fumador activu, de que llegue 2006 pa que nun se pueda fumar nes aries de trabayu.
0900 ya ta'l calor y pa enriba'l filu musical pon raguetón d'eso. lo de la música comercial ye dalgo que nun soi a entender, como ye eso de que te tean poniendo la mesma mierda, les coses pol so nome, cantar cuatro, cinco veces per día. la xente pa encima creyese'l tema llatinu ensin pensar que nun ye una identificación cultural sinon que ye una identificación comercial fecha sobre unes cultures con característiques bien asemeyaes pero tamién bien dixebraes.
1000 amás de pensar sigo colos palés nun vos creyer. llegué incluso, con esto de la música llatina, qu'había xente que sólo escuchaba música en castellano porque yera lo qu'entendía paecióme dalgo gravísimo, una cerrazón mental qu'amás obliga en munchos casos a tener que soportar tediosos cantares, que tamién pasa cola música n'otros idiomes, pero lo d'obligate a soportar cantares nun solu idioma ye pasase.
1100 la selmana pasada quixi dir al jazz pero siempre quedaba enantes y me lliaba y acaba por nun dir. el miércoles tocó'l gran isaac turienzo, nos sos conciertos turienzo empérrase en que los que nun tenemos oyíu musical desarrolláu podamos sintir les melodíes y entendeles, asina cuando toca una pieza tradicional asturiana col piano y el so triu ibéricu podemos sentir les pallabres del cantar ente les notes del pianu. la música nun ye la pallabra, la música son los sones que despierten sensaciones nel celebru de caún. y como diz el mio amigu nesto nun hai música fea, hai qu'escuchar de too.
1300 tantu musicar que me pasó la mañana volada.
1500 vuelta, como fai calor primero d'entrar ponémonos a la solombra y falamos un cachín, presta.
1600 una rueda de les que taba revisando dicía made in usa with global components (fechos nos eeuu con componentes globales) una sierra dicía designed in sweden made in india (diseñada en suecia, fecha n'india). máximo nuna de les sos viñetes de el país d'esti mes dicía: "pases fame en kabul y pones una bomba en madrid" a lo que-y retrucaben "ye lo que tien la globalización". la wolsvagen, paezme que s'ecribe asina, va recortar puestos de trabayu n'europa porque nun consigue los beneficios reclamaos polos accionistes, hai beneficios, el so mercáu ye prioritariamente europeu, va trasladase a otres partes onde la mano d'obra, les lleis llaborales y los costes sociales van ser menos d'un terciu de lo que son agora n'europa y los coches van valir lo mesmo; hai xente que diz qu'eso ye xusticia. la wv puso fábrica na china onde tenemos al gobiernu asturianu de visita (gran muralla, ciudá prohibía, plaza tiananmen...)amás del gobiernu van ovidio y los secretarios autonómicos de comisiones y uxt que van a da-yos llecciones de negociación colectiva a los cuadros de los sindicatos chinos. la cosa tien muncha gracia y que caun saque les sos conclusiones.
sometimes i feel happy, sometimes i feel sad