quincuaxésimu día

0705 llevántome. toi daqué espesu, debió ser la tarde en el paragües, igual la compañía, nun sé pero la cosa ye que me cuesta un poco más qu'otros díes.
0757 entramos, non sin primero echar dos pitinos de la qu'esperábemos a que s'abrieren les puertes; güei'l congresu español taba p'aprebar una llei, de la que yá se falara equí, que tien por obxetivu la prohibición del consumu de tábacu nos centros de trabayau y espacios de consumu d'alcohol (que provoca cirrosis, cancer, alteraciones gravísimes de la conducta, perda de la consciencia, desestructuración familiar...) y que paez nun van prohibir, ente otros sitios.
0900 ayer quisi ver por enésima vez 'eyes wide shut' del anguaño director preferíu, después d'alberto pardo, de mio que ye stanley kubrick, debe ser la tercer vegada que la quiero ver y siempre l'alcuentro entamada y claro si nun ves l'entamu pos nun presta. aun asina y evitando entrar na tema de les sociedaes, más o menos, secretes prestaríame desenvolver un cachín la tema de la fidelidá. a esti mester emplegué tola xornada. cuando tom cruise accede a la mansión la pallabra clave ye fidelio.
1000 autoanalís: negación a mantener una rellación llarga, mieu al rechazu, mieu a mancar, escaezu, tar en dolar, tar en zielu, tar en paragües, tar en posafuelles, nun alcontrar una persona cola que tar enforma a gustu, promiscuidá, lliberalismu, celos, falta de tiempu, falta de ganes de compartir el tiempu, negación de la obligatoriedá.
1100 el pecáu ye de pensamientu, pallabra, obra o omisión. eso dicen.
1115 ganes de quedar con otres persones.
1130 egocentrismu?
1200 si esiste una cosa a la que soi fiel esa ye la de la soltería. igual ye porque nun me quiero amoldar a les rellaciones tradicionalmente establecíes na nuesa civilización, pero si tengo una cosa segura ye que los vínculos afectivos ente dos persones nun han basase esclusivamente na fidelidá o non de la pareya.
1300 salgo, echo un pitu. nun tengo nada claro.
1500 vuelvo.
1600 toi pensando en dexar de comprar el país, nun se debe esta decisión a motivos ideolóxicos sinon sociolóxicos, siéntome a parte de los mios compañeros, nun sé de fútbol nunca me prestó, nun vi sacar temes políticos o d'actualidá polo que pueda pasar, comprar el marca (creo ye'l periódicu más vendíu en estáu español, qué vergoña! depuñes presumen de ser un estáu cultu) puede ser una bona opción anque por motivos de nun pasame colos cambios repentinos prefiero siguir cola mesma llinia editorial y mercar el as.
1700 comento les noticies deportives, bien yá tengo collacinos, sabemos que que a beckham-y presta dir de pantalones cortos cuando ta na nieve esquiando y demás chorraes que si a nun sñe que xugador del madrid páguen-y dos mil millones de pesetes al añu por dir detrás d'un obxetu que se pretende circunferencia, porque entovía nun s'algamó el balón perfectu, y coses asina qu'a mi pos como que me la suden y bien sudaes.
1800 operación ogro, el militante vascu vien un domingu de mercar el pan cuando pasen autobuses llenos de ¿oveyes, babayos? glayando hala madrid, elli piensa si la so llucha pola llibertá tien dalgún valir pa esa xente qu'ante una dictadura nun tenía más preocupación que la de ver al ¿so? equipu de fútbol.
1830 ganó alonso y asturies ta percontenta. el gobiernu del bloque y la fsa, cola participación estelar de paco de asis, recuerda el so gran sofitu al campeón, que paseó la rojigualda (la tricolor ye la de los que perdemos), gabino fae lo mesmo, toos quieren salair na semeya con elli. en catalunya tan negociando l'estatutu d'autonomía que reconoza a catalunya como lo que ye una nación.
1900 sigo pensando en dexar de comprar periódicos y revistes pa bichos raros, igual hasta llego a pensar en que tendría que salir más de los mios diez quilómetros de radiu de vida, conocer otros mundos, otes cultures, nun sé.
1930 cola cabeza dando vueltes. voi a la gasolinera a comprar tabaco y marcho pa casa. una de les coses males de les gasolineres que venden tabaco ye que nun te dexen fumar n'elles.