vixésimu octavu día

dixeron que diba llover y llovió, anque non tolo que quisiera.
0742 puntual salgo de casa pa dir otru día más a la xera.
0800 póngome colo avezao demientres dalgo más d'una hora, entamo a pensar si llevar reló pero como que ye dalgo qu'estorba y que cuando nun tienes costume quedes cada poco mirando pa elli babeando y diciendo mira qu'hai sólo mediu minutu qu'acabó ver qu'hora yera; o cuando t'entruguen pela cai la hora que ye y tu invariablemente, anque lo hubieres visto hai tres segundos, como pa date un aspectu de rigurosidá infalibe vuelves a miralu, si tanta priesa tenía que llevara un reló. poro yo tómome les coses con tiempu pa que salgan meyor.

0900 póngome colos palés. a esta hora aproximadamente l'exércitu republicanu irlandes fae anuncia de la declaración de tregua indefinida depues d'un durísimu procesu de negociación col gobiernu británicu alcuerden llegar a unos puntos mínimos sobre los que construyir un futuru nel que los y les irlandeses de los seis condaos van ser los protagonistes del mesmu y nel que la so voz va ser soberana. atrás queden los años de la represión y de los asesinatos promovíos dende'l gobiernu británicu, atras han quedar los años de discriminación por mor de ser irlandés en so país.

1200 sigo colos palés. coloco delles coses peles estanteríes de la tienda. esta fin de selmana voi pa cabrales, voi dir a san pedrín, cae en sábadu y esta nun me la quita naide, nun ye lo mesmo por supuestu pero ye un consuelu. anque igual mañana'l xefe me diz que tengo que dir a trabayar el sábadu, porque la xente ta de vacaciones, y claro dir a trabayar un sábadu que nun me corresponde depués de 47 hores y media como que nun presta, y menos si na nómina nun va tar. un contratu de trabayu, una relación llaboral, tien d'entendese como la simbiosis ente'l propietariu/a/os/es de la empresa y el trabayador/a onde les dos partes necesítense la una de la otra, polo qu'establecen un alcuerdu pol que se comprometen a collaborar pa un fin común que ye'l de qu'a la fin del alcuerdu ésti pueda renovase. pa renovase l'empleador/a/os/es tien de cumplir les sos partes (salariu en tiempu y forma, respetu llexislación...) y l'empleáu/ada/os/es (cumplir col cargu desempeñáu, profesionalidá...). en resumen un contratu de trabayu ye un alcuerdu llibre ente dos partes pol que estes compromtense a dase unos servicios mutuamente, y por supuestu culesquier variación del contratu tien de ser consensuada poles dos partes.
1300 pa casina, unes ganes d'echar la siesta que nun veo.
1500 llegamos y volvemos a sacar toles coses pa fuera.
1600 salgo a meter cartones en contenedor azul, hai que reciclar pero tamién había que reutilizar más. miro pal cielu y decátome de que'l sitiu onde toi sía un de los pocos d'asturies onde la visión del horizonte pueda dase casi nos 360º, obviando les cumes del cordal. el cielu ta perguapu azules de tonalidaes agresives que contrasten con esi otru azul virxinal del branu asturianu. a un quilómetru restos d'un castru.
1700 suena estopa, versioneen a serrat, mediterráneo agora que toi en casa toi escuchándola; nací a la vera del atlánticu y paezme que los y les que nacimos frente a la mar sentimos dalgo perespecial por ella. échola falta y por eso cada vez que voi a xixón lo primero que faigo ye dir a la escalerona y ver la mar, y si nun ye onde la escalerona voi pa cimavilla a perdeme per eses cais del barriu más tradicional y vanguardista de xixón.
1800 sigo colos palés, anque la tarde nun sía demasiao abegosa. lleguen cinco palés de siguío, ye muncho. alcuérdome de la tarde nuche d'ayer en el paragües con amigos a los que lleves sin ver munchísimo tiempo, mantener una conversación tranquila yá falando del pasáu, como si yá nun fuéremos mozos, remebrando batalles d'otres époques que fueron meyores o quiciaves eso mos paez.
1930 son dos meses.
negociando tolos conflictos tienen igua.