segundu día

son les 7 la mañana y yá tengo que me llevantar otra vuelta entama otru día más, la ilusión de pensar que depués d'esti solo van quedar 178 p'acabar el contratu ye la que me motiva a llevantame.
0900 apaez un palé enorme componentes llétricos, creo, los mozos d'alamacen solu vemos les referencies. Entamo mirar si ta too.
1200 depués de ver que sí taba too lo que yera y de volver empaquetar lo enantes desempaquetao abro otru palé.
1300 salgo, tengo fame. y sobre toles coses fumo, alcordáivos de que nun puedo fumar; anque cuando saqué la basoria vi que onde'l cubu hai munches colilles, habré siguir observando.
1500 vuelta a la contabilidá.
1510 reflexón: la llingua asturiana úsase con tola naturalidá del mundiu, lo normal ye falar n'asturianu. lo que nun tengo seguru ye si esiste conciencia llingüística; quién sabe?
1700 depués de cuntar el segundu palé, y volver metelo too en caxines, dícenme que vaya pa fuera a barrer, salgo sorriente tar fuera l'alamacén ye como tar na terraza d'el paragües. L'aria en cuestión ye como dos canches de futbito, los compañeros van dir xugar futbol esti sábadu yo yá sabéis que como que non.
1800 barrí la cancha, había espumillón d'eso que s'emplega p'adornar les cases n'avientu. póngome con otru palé hasta les 1930 y vuelvo pa casina.
1940 llego a casa y cámbiome, xubo a uviéu. sueño con una mahou...
2200 los güeyos nun se tienen abiertos, adios uviéu adios cerveces, el ferreteru derechu pa la cama...

primer día

630 toi contentu, ayer francia dixo non al tratáu de la unión europea. la izquierda esiste.
645 llevántome
730 salgo de casa pa pillar l'alsa, enantes conocíu como llanera.
740 tomo'l café con lleche del tiempu, lo de la lleche natural vamos dexalo; nunca meyor dicho; pa prau.
755 echo'l que va ser l'últimu pitu de la mañana, suaño conque dea la una pa echar otru.
800 entamo a trabayar.
805 descubro que pa funcionar cola aspiradora hai que-y poner un cartonín nel botón d'arrancar.
900 danme ropa de la empresa, pantalones azul marino y polo mariellu, siéntome'l fernando alonso de la llimpieza.
920 descargo un palé, cuento les caxes de torniellos del palé.
1100 depués de cuntales y ver que tan les que teníen que ser, vuelvo a meteles en palé. fale solamente col encargáu del almacen.
1130 entamo la etiquetación de manielles pa les puertes, podíen pone-yos un códigu de barres a fueu, diba quedar perguapu.
1230 acabo de les etiquetar y llévoles pa la tienda.
1300 salgo, pienso n'echar un pitu.
1436 yá comí, yá toi fumando un pitu, vuelvo pal trabayu.
1450 depués de caleyar per una zona de llugones que nin pel maxín pensare qu'esistiere, tres venti años viviendo en llugones la cosa ye grave, llego a la ferretería otra vuelta.
1500 vuelta al trabayu
1505 apaez un palé enllenu torniellos de tolos tamaños imaxinables, collor solo'l plateáu, pesa sólo 800 quilos puru aceru vascu, qu'esos si que se lo montaron y supieron da-y salida nacional a los sos altos fornos; anque'l final fuera'l mesmu que'l de los de nueso.
1700 depués de cuntar les diferentes menes de torniellos y catalogales, vuelta a metelos en palé pa llevalu perdayuri.
1800 llámenme pa qu'abra la puerta a la xente qu'entra, tan llimpiando los cristales.
1900 entamo a barrer l'almacén.
1930 ye la hora de salir pero tengo que subir un paquete papel hixénico a una estantería, tengo que me xubir a una escalera, miéu busco los frenos de la escalera y darréu xubo los paquetes hixénicos. pel tactu nun van dir a un bañu pretenciosu, y eso que taben col plástico.
1945 llego a casa, escribo.

alvertencia

el conteníu d'esti blog ye absolutamente imaxinativu, cualesquier paecíu o semeyanza cola realidá ye casualidá. los nomes, feches, llugares, empreses, xeres qué equí se citen son tamién imaxinarios, colo que cualesquier semeyanza cola realidá ye coincidencia. lo que nun ye coinciencia ye la realidá llaboral de la mocedá asturiano, condenada a la emigración y a trabayos que nun respeten los mínimos derechos llaborales de los y les asturianes; la responsabilidá d'esta negación de derechos correspónde-y al gobiernu asturianu; coalición del bloque por asturies, izquierda unida y federación socialista asturiana; na so dexación de funciones y regulación en materia llaboral, que faen posible que miles d'asturianos y asturianes tengan que trabayar en condiciones precaries.
que vos preste.
gracies por lleer.