trixesimu séptimu día

0730 depués de duchame pusi la cnn pa ver como taba nueva orleans, la nueva atlántida. miles de persones salíen de los comercios depués del saquéu, ironíes del sueñu americanu del 'american way of life'. la movilización xeneral de la población, l'abandonu de tolo que se tenía pa poder siguir viviendo, l'agua cubriéndolo too. la ciudá muerta.
0800 entramos y nun se me quiten les imáxenes, sigo con elles, ye normal. siempre dixi que teníemos la suerte, relativa, de vivir nuna dómina perimportante y na que los fechos asoceden tan rápido que casi nun somos a los interpretar, lo mesmo qu'entovía seguimos estudiando a platón o a sócrates y viendo'l xeniu políticu de julio cesar o marco aurelio. vivir en directu l'anexón por parte la mar d'una ciudá ye un espectáculo que poques xeneraciones pueden ver, supera a la posibilidá de ver al cometa halley con muncho. tamos robando-y la vida a la tierra y mos devuelve los golpes.
1100 sigo trabayando. otra vez el llibru. otra vez noe. otra vez esi barcu qu'atraca nel cai del monte.
1300 sube la gasolina dicen que por catrina, qu'asina se llama. lleno'l depósitu, euro con noventa y tres ensin llegar a los dos llitros. pero la cosa ye que'l combustible fosil ta acabándose. el national geographic d'estos dos meses pasaos, lleva asina un bon númberu d'ediciones falando sobre l'impactu de la humanidá nel clima, referíase con dellos artículos tanto a la necesidá d'entamar a facilitar la demanda d'enerxíes renovables asina como a la medra de les posibilidaes de l'apaición d'huracanes, tornaos, l·lunamis por mor de les actuaciones contaminantes del norte industrializáu.
1500 vuelvo.
1600 800 muertos al pasar una ponte, iraq. 'hai que crear un, dos, tres vietnams' dicía'l comandante che guevara, iraq ye un nuevu vietnam, afganistán bien podría ser otru.
1800 la medra de l'acuicultura nel sudeste asiáticu intervino de forma perimportante nel tsunami, le monde diplomatique de xunetu (o agostu). enantes había una barrera d'arrozales ente la mar y los pueblos, güei los pueblos tan a la vera la mar. el fmi vendió-yos la necesidá d'avanzar nos cultivos. resultáu a la vista.
1930 salgo. miro pal cielu ta claro, tranquilidá. tamos nel güeyu del huracán onde la paz ye aparente.

trixesimu sestu día

ye domingu. n'arenas tan cellebrando'l certame del quesu cabrales, esti que ye un branu de novedaes nun toi, nun ye que lo eche en falta, porque como ye persabío nun me presta'l quesu cabrales, pero si ye dalgo a lo que siempre prestaba dir, más nada que pola folixa.

llevantéme ceo pa dir a falar de la llingua asturiana a los y les moces que tan nel intercambiu qu'entamara'l conseyu de la mocedá d'uviéu. la nueche del sábadu foi mui mala, un conciertu de heavy contra casa ye dalgo insufrible; anque como solo fue por una nueche ye pasable.
yo de la que la xente taba en conciertu quedéme en casa viendo el resplandor de kubrick, que ye perguapa; y depués como quien nun quier la cosa en la dos pusieron pauline en la playa que ye una película xenial y amás en versión orixinal. la cosa ye qu'eses películes pónenles a les 3 de la mañana y hai qu'esperar viendo la teletienda y los anuncios del abdominazer del carayu y la multifunción pal llar que bate, mece, aspira, frega, llava la ropa y llama al mélicu cuando te pones malu, vamos que si se lleguen a esforzar un poco más incluyen un accesoriu vibrador y otru succionador pa cuando nun tea la pareya, too por 99,5€ y si llames ente los venti primeros lléveste otra pol mesmu preciu. depués tan los anuncios de les llinies y xats eróticos, los sistemes de mensaxes piquininos (ssp) col númberu de teléfonu siempre son d'homes y los que nun tienen teléfono, nun sé porque anque paezme que creo sabelo, son de muyeres sobre too en grupu, amás de los mensaxes hai películes como ulises, claro quien va pensar qu'envede ser la odisea d'homera van poner el viaxe de la celula mediada masculina a la gueta la célula mediada femenina polos diferentes furacos del cuerpu canso y pásome pa popular tv onde tan lleendo'l cantar de los cantares 'corramos! méteme en to cuartu, disfruemos xuntos y gocemos!' o 'los tos llabios destilen miel virxe, debaxo la llingua de to escondes miel y lleche. el mio amáu metió la mano pel furacu la pesllera, y les mios entrañes estremeciéronse' bono too erotismu y tradición asina que decido pasar al nickelodeon, que ye una canal infantil, qu'a eses hores solo pon que teas sollerte porque a partir de les 6 de la mañana van entamar la programación otra vuelta.
en fin eché de menos nun tar de folixa.
y mañana a trabayar.

trixesimu quintu día

yá queda poco pa qu'entame la lliga de fútbol, la copa del rei, pa qu'hora 25 entame la so intermitencia programacional, yá tamos entamando otru cursu políticu; quiciaves meyor cursu deportivu. depués de ver a gaspar votando col pp, que nun pasa nada nin ye tan grave, col puñu n'altu fernando alonso dispónse, too paez que ye positivu, a ganar el campeonatu del mundu de formula 1, cosa insolita cuando nesti país la visión de la clase dirixente nun va más allá de los circuitos de 'carts', melendi seguirá poniéndose col xicolate y aturullando a la xente normal y leti parirá a pelayín o a covadonga, o quien sabe igual tien ximielgos y d'una tirada algama la parexina. equí van piesllar les mines que queden, que yá nun son munches, pero van facenos munchos museos, a ver pa cuando monten un muséu de los horrores políticos de la fsa y del atrasu al que los sos años de priismu tan llevando asturies. easyjet reduz el númberu de conexones con londres y se piensa si ye rentable conexonar con otros aeropuertos, ryanair ta mui contenta en compostela y santander y que d'eso de venir p'asturies que naranxes de la xina, que bien que lo pasara la representación asturiana allá.
el plenu del ayuntamientu cabraliegu apreba, per unanimidá, la venta del edificiu de la guardia civil pa contruyir otra casa cuartel. en cabrales nun esiste la vivienda protexida. la xente marcha de cabrales. cabrales ye de los conceyos más probes, o con más diferencies económiques d'asturies, un pisu de dos habitaciones vien a valir unos 3400000 duros, más l'¡va y demás coses, y eso ye una auténtica estafa, poro la solución ye emigrar. pero a los picoletos va faceyos l'ayuntamientu una casa pa que tean contentinos.
l'electropedagogo l'otru día, polo que cunta, déxome tiráu en posafuelles elli perdiólo que nun conoció a una moza mui prestosa a la que dende esi día busco peles cais d'uviéu ensin suerte. estoupo

diz que va dexar d'escribir el so blog y yo nun quiero que dexe d'escribir. ta orbayando y como son casi les 15 paezme que yá va siendo hora de llevantase.

yá pasa d'orbayu

trixésimu cuartu día

0757 entramos. nada nuevo. nun llueve, pel momentu.
0915 acabo llimpiar. la fería de la mano vuelve abríse, cúrome.
0930 cuando la xente tien funciones de mandu, pa les que nun ta capacitada, asimila el modelu facista de la orde; la so voz, tormentu del silenciu, tórnase tormenta y los oyíos, sentíu más importante de los que tenemos, entamen a carecer. estes selmanes tengo sofrir les voces del facismu, les voces de la ignorancia. imitadores de benito, adolfo y paquito (pacón yera'l primu, más altu). ye triste ver que piensen que'l so poder vien de la so capacidá cuando la so capacidá vien de la fuerza de la so voz.
1200 pasa la mañana cuando otra de les voces del facismu s'avera a min pa decime que'l mio tic llingüísticu de dicir davezu 'e' molesta. respondí que depués de ventisite años aquel rasgu diba seguir conmigo y nun taba dimpuestu a renunciar a esi rasgu de mio que supón una forma de diferenciación respectu al restu de la xente, amás de valir pa que l'interlocutor repita lo que me ta diciendo y pueda pasar del 'stand by' al 'ready' darréu.
1300 salgo. llueve. la pata de la moto rompe. voi al taller. igüenla. llego a casa.
1500 vuelvo. pasa la tarde. 'esta lloviendo hoy, el cielo está gris. llueve un día sí y yo no puedo salir.'
1930 salgo. una de les coses a les qu'obliguen estos trabayos ye a tener que cambiar de peluqueru depués de ventidos años, nun me presta. si yá la cosa de dir a la peluquería supón un esfuerzu enforma tediosu pa min, dexar que xuegue cola navaya en cuellu un completu/a desconocíu/a ye dalgo que cuanto menos tien una semeyanza cola apuesta de la ruleta rusa.
2015 entro na antigua rede troskista de divulgación cultural francesa a mercar 'the shining'. preparo una fin de selmana en casa, aprovechando la posibilidá del insomniu na nueche del vienres y del sábadu.

trixésimu tercer día

0705 otra selmana más qu'entama. ta frio y dicen que pel día va facer calor. el cielu ta con abondes llugues ente'l nubláu de la mañana del aria central del país. alonso quedó segundu; melendi, que nun llee, enteróse pela tele.
0756 ábrense les puertes del limbo, llugar desapaecíu demientres el pontificáu de carol voytila y que nun tenía base teolóxica pa esistir, onde les ánimes de los non bautizaos han vagar la so esistencia, lloñe de los bienes del paraísu y de los mundanos placeres del ifiernu.
0910 acabo facer lo que faigo toles mañanes. entamo a colocar delles coses que quedaren del vienres pendientes, faise rápidu y llevaderu. pienso nel día d'ayer cuando lleía o relleía artículos de prensa guardaos dende xunu y que taben esperando pola so llectura. artículos que falaben de la construcción europea, del retrocesu de los derechos y servicios a los y les trabayadores, de los recortes que sofren les persones que nun tienen un puestu de trabayu por mor de les economíes del neollibrecambismu que s'impón a la lóxica humana. un panorama desolador que mos fae pensar y vindicar n'otra asturies, n'otra europa, n'otru mundu posibles.
1100 llega'l limbo. nada que facer. too fecho. llegó maria antonieta, sácola a baillar 'libiamo, ne lieti calici' suaño cola voz de maria callas. siéntome un traidor pa maria antonieta, toi ballando con ella, pero pensando que nun ella, y ella nun cambió. prollóngase la danza cuando desecute corténme la música, el suañu, he dir colocar coses.
1300 salgo, non sin primero danzar otra vegada más.
1500 vuelvo.
1600 hai coses positives del filu musical, por exemplu que dalgunes vegaes pongan a los chemical brothers. lo demás ye detestable.
1700 entamo a cuntar ropa, actividá que se desendolcaría demientres el restu la tarde.
1924 toi preparáu pa marchar, dícenme qu'hai que cuntar gabetes; les muñeques ruses d'aquella otra vegada. siempre les piden nel últimu intre. quédome hasta más tarde.
2001 llego a casa y esta vegada sí suena la traviata na voz de maria callas. maria antonieta durme.

trixésimu segundu día

paez que me toi avezando a escribir solo les fines de selmana debe ser cosa d'agostu voi facer por escribir lo más posible.

0800 entramos, hai cambiu de turnu de vacación los que marcharen hai ventiun díes vuelven a la xera y los que nun marcharen entá son agora los que marchen, toos menos yo. sé que nun ye xusto nin llegal pero paez que la situación ye la qu'hai, conformismu.
1100 de la que desanudo un cable entamo a pensar, por ciertu desanudar un cable ye una actividá enforma divertía y entretenía pases el tiempu perbién, sobre les nueves polítiques que los países europeos quieren entamar a aplicar pa la prevención de nuevos atentaos. como un ñudu en cable la llibertá de movimientu y actuación de los y les ciudadanes va vese restrinxía, la nuesa privacidá tará en poder de los medios de seguridá del estáu, incluso esto que lleeis podría tar siendo censurao. si esto pasa en cuba, china, corea del norte, libia (que pasa) dizse que ye la continua violación de los derechos ciudadanos por parte de los rexímenes comunistes pero cuando pasa nel occidente de la democracia ye pa salvaguardar la seguridá de la ciudadanía. orwell tenía razón razón en 1984 y nun profetizaba como se quiso, y se quier facer creyer, los males a los que conducía'l socialismu. cuando los eeuu de a creen una televisión pa los países árabes, como aquel llibru de la resistencia, cuando s'anuncia que les anuncies que vamos ver pela cnn o los comunicaos del pentágonu van tar contaminaos conforme a los intereses del gobiernu de los eeuu de a. la deriva de privación de llibertaes nos estaos europeos acaba d'entamar y polo que vemos nun ye que vaya por bon camín.
1300 salimos.
1500 volvemos.
1700 toi con un palé. fecho n'arabia saudita. nun sé porqué pero entamo a pensar nes similitues ente afganistán ya iraq. afganistán enantes de llegar los americanos yera un país asiáticu que tenía unes lleis avanzaes no social y nel tema de la muyer n'específico, la universidá tenía prestixu y en fin podía dicise que yera un país que diba en bona confluencia p'algamar unos niveles de vida más dignos que los de los sos vecinos. iraq yera un exemplu d'estáu llaicu, nuna rexón onde la mesma pallabra suel tar prohibía, la universidá y los estándares yeren avanzaos y en dellos casos similares a los de dalgunos países europeos. n'afaganistán los talibanes ficiéronse col poder gracies a los americanos, capítulos de mc gyver y rambo i tan como bon exemplu, y desficieron tolo avanzao incluso la democracia que tanto dicen defender. n'iraq tan desatando los mesmos problemes. primero un embargu que mató a millones agora esa guerra que nun va a nengún sitiu.
1900 funeral polos militares muertos n'afganistán. el pp diz que nun va comparar pero compara, el ferreteru tamién compara l'helicopteru pertenecía a les ffaa españoles l'avión non; acabóse la comparación. en funeral taba felipe gonzález antigüu primer ministru español nun taba jose maría aznar. taría col xenru y berlusconi mirando que más medios de prensa dominar?
1930 salimos, corripia ya ye mayor. maria antonieta va volver de les vacaciones na islla de la deva

esta selmana asina que vais saber d'ella en breve.

crónica de ventiseyes hores, y dalguna más.

1741 salgo corriendo de casa pa garrar el tren de les 1747.
1743 vuelvo corriendo pa casa, pesllé o dexé la cerradura sin dar les dos vueltes.
1744 taba pesllao. vuelvo correr.
1746 toi na estación, tico y llega'l tren. puntual. phileas phog quixo sobornar a un maquinista del tren indiu pa llegar más ceo a la estación, el maquinista díxo-y que nun podía los horarios taben prefixaos. el tren ye, pel momentu, una de les poques, igual la única, empresa de transporte pública y hai que reconocer que'l so funcionamientu, polo que respecta al tráficu de ciudadanos y ciudadanes ye enforma afayadizu y eficiente.
1800 llego a uviéu y voi pa la estación d'alsa, digo a la estación d'autobuses d'uviéu xestionada por alsa; que como nun tien intereses nesi ámbitu ye una mui bona opción pa xestionala de forma ventayosa pa toles demás empreses del ámbitu.
1805 saco'l billete pa carreña. cuando digo solo carreña dícenme que nun-yos sal retuco que carreña solo hai una que ye la que ta viendo col apellíu, lléo-y'l pensamientu de "otru bablista más". uviéu-carreña 7.15€. ayer en el país salía un vuelu madrid-zurich por poco más.
1815 la xente debe tener ganes de marchar porque yá ta faciendo cola delante la puerta. póngome a la cola como si fuere pa baillar un son caribeñu d'esos. nun entiendo por qué tan pronto pero...
1830 puntualidá na salida. voi solu. siempre faigo por dir solu. que naide se siente xunta mi. cerca de dos metros nesos asientos con separación ínfima faen que tenga la necesidá d'ocupar casi les dos places. amás prestame dir lleendo y sintiendo música.
1905 llegamos a la pola, pili sale de la cafetería. fae mui bon café. nun me ve.
1930 nava.
1945 l'infiestu.
2000 les arriondes. tresbordu los que van pa cangues han dir pa otru bus, los que van pa cabrales n'otru y los que van pa llanes siguen nel mesmu autobus. claro a llanes nun va naide porque tienen servivicos directos cada dos hores polo que'l bus marcha vaciu y los que nun vamos de playa a cambiar.
2010 llegamos a cangues. hai muncho tráficu.
2030 dos hores y yá tamos en benia.
2045 por fin las campinas. hai un coche. prendo'l pitu y subo ye alberto que vien de dexar la cerillina con manolo y conchita. súbeme a puertas.
2050 llego a puertas. dexo les coses en casa. molque alégrase de que tea ellí, tuvieron tirando voladores.
2056 voi pa el carmen. había escursión y nun tengo a naide en casa, pel momentu. saludo y cenamos. quedamos pa depués pa dir p'asiegu. primera fiesta del branu que voi ver en cabrales.
2200 depués de vagabundear y saludar a los mios güelos vuelvo pa el carmen pa concretar la hora a la que vamos p'asiegu.
2215 vemos a pablo'l de la braña. diznos qu'elli tamién va dir pero primero que va p'arenas a cenar.
2315 félix ye'l que mos lleva a ana, valeria y al ferreteru.
2330 acabamos de llegar y como si yá lo supiera plantáu en mitá la plaza la ilesia vemos a fernando, cansu yá d'un día enteru sin siesta y de cafés y cafés.
0000 tamos de fiesta
0556 marchamos.
1430 llevántome. como. voi pa la braña que ta ellí tou'l pueblu comiendo.
1656 faigo la maleta.
1715 marchamos pa las campinas. l'autobús sal d'arenas a les 1735.
1750 llega l'autobús. tresbordu en cangues.
1830 llegamos a cangues. l'autobús que tenía qu'esperar yá salió. vuelta pal coche nel que veníemos.
1845 llegamos a les arriondes cambiamos de bus. definitivu.
2000 uviéu.
2012 pillo l'urbanu y voi pa casa.
yá lo dixi más veces ye una vergoña qu'esa empresa monopolística tenga concedíes prevendes y privilexos de por vida; nun ye entendible qu'un día de branu pa dir al oriente solo haya tres llinies. nun se fomenta l'usu del tresporte públicu. pagar 6 euros por dir a los lagos ye barato porque nun ye una necesidá, pagar 7,15€ por dir d'uviéu a cabrales ye una estafa porque eso sí ye una necesidá colectiva. nun pue haber gobiernu d'izquierda cuando'l qu'asina se proclama nun vela polos intereses de la ciudadanía proponiendo y favoreciendo la implementación de servicios públicos reales y eficientes.

trixésimu segundu día

0705 como davezu salgo de la cama, sabiendo qu'esti ye'l primer día nel que voi dir al trabayu na moto que taba en casa guardada, con emoción y tamién dalgo de nervios ante la situación de conducir per primer vegada ente tráficu de verdá y non como taba acostumáu ente los cuatro coches de foriatos que paseen per cabrales tolos branos. la situación yera nueva y desconocía y diba ser significativa pal trescurrir del día.
0740 primero qu'otros díes, pero cola sida de nun garrar tráficu enforma salgo de casa.
0743 llegué al almacén. tou bien.
0800 a facer lo de siempre.
1930 llamo a corrupia pérez, popular personaxe tamién de electropedagogo.blogspot.com y de estoupo.blogspot.com
conocía poles sos andances nocherniegues pa dir al teatru de el fontán, pero como llovía marchamos a tomar botelles de sidra y cerveces pelos bares uvieínos. con nos vinieron la voluntaria y el so collaciu y vero que tamién fuera voluntaria. allargóse la nueche faciendo qu'ésti al día siguiente casi nun se pudiera llevantar.
toi preparando un especial sobre las nieves, esa fiesta a la que la patronal nun me dexó dir.

víspora

güei nun hai hores, mañana son las nieves en puertas y yo nun voi tar. primer vez en tola mio esistencia que nun voi poder tar na fiesta del mio pueblu, del llugar au pertenezo. atrás aquelles primeres h.umeras, atrás aquellos besos furtivos, atrás aquellos calderos, atrás la casina, atrás un tiempu que desenvolvió d'una forma perimportante la mio vida. colos años fui tarreciendo les fiestes de prau, nesta nun hai prau pero'l conceptu ye'l mesmu, pero las nieves siempre fueron dalgo especial. dende va unos años la única folixa na qu'aguantaba hasta l'alborada foi la charanga de la salú, pero dexó tamién de ser lo mesmo cuando los y les collacies entamaron a trabayar y dir fuera cabrales agora tócame a mi sofrir en trabayu. echo en falta nun tar en casa agora mesmo tar nes vísperes en casa luisa, bártalo cuantayá que piesllo, cola xente que como yo tuvo que marchar buscando un futuru que, desgraciadamente, nun había en so llugar.
otros años, que tamién trabayaba, dábame tiempu a dir xintar a casa, a tar pela tarde tomando sidra depués mahou y más llueu esi cuty shark con trina que tanto me presta, siempre y cuando'l vasu nun sía de plásticu. aguantar, dar que dicir. agora la xente entrugará per min, allegrárase cuando sepian que toi trabayando y dirán que vaya pena que nun pueda tar.
mañana voi cellebrar las nieves nel uviéu agostín, niégome a tar en casa, ye la fiesta del mio llugar, al que pertenezo y al que sé qu'un día d'estos voi volver yá pa siempre.
mañana voi tar colos/es mios collacios/es d'acá, que tamién son parte de la mio familia.
felices fiestes.
me paez que pa san roque si voi poder tar.
la selmana pasada nun pudi dir a san pedrín, la viespora yera'l domingu y la fiesta'l llunes.
unos a pie, una tropa.
otros a caballu, dicen que ye lo más guapo.
sicasí lo más guapo ye lo qu'ames.
safo

trixésimu primer día

0800 primero salir de casa tuvi viendo los blogs de los collacios onde anunciaben les sos vacaciones, y planes braniegos, depués estenderéme sobre los de mio. fici lo que se suel facer cuando s'entama la xera.
0900 entamo con un palé de fixaciones metáliques. made in la rioja. amás de vino faen fixaciones. el meyor vino de la d.o. de la rioja nun ye de logroño sinon que ye vascu. l'aceru de les fixaciones nun ye de logroño, tamién ye vascu. el gobiernu de logroño diz que los derechos históricos de la cav son inconstitucionales. nun hai quien los entienda. na arxentina tamién hai una provincia que se llama la rioja, nun ye una provincia talmente pero poles dimensiones vamos dexalo asina, tamién faen vino pero nun lo pueden llamar rioja. en francia faen cognac, nel estáu español faen brandy polo mesmo y tola xente sigue llamándolo cognac. n'asturies a la sidra llámenla caldo pa que se paeza más al vino. la mazana vien del árbol del bien y del mal y ta perenriba la tierra. la vid arrástrase pel suelu como la culiebra qu'incitaba al viciu y al conocimientu. igual al final la cosa ye que'l frutu del árbol del paráisu nun yera más qu'una bona h.umada.
1100 tengo ganes dir a casa y ver la programación nueva de telecable, eso sí sin tlx, tlavilés, localia c10. como pertenezo a la zona d'uviéu quédame utv, popular tv y teleasturies. hai una llei que diz que les empreses nun pueden adoptar como nome'l d'una provincia o comunidá autónoma. n'asturies cola cosa de que somos principáu si quites el quites principáu la llei yá nun t'afecta. sicasí telecable pa los usuarios/es ye una rede privada de televisión na que los conteníos han tar puestos pola empresa y los/es usuaries y non pol gobiernu del bloque por asturies y fsa.
1300 salimos pa casa, hai fame.
1500 vuelta al tayu.
1530 yo nun marcho de vacaciones. anque otros otros tampoco tuviera unes vaciones de branu ad hoc podía dicise que taba de vacances en cabrales, depués echaba nel centru 9 meses de vacaciones, vamos que ni leticia ortiz de borbón nel bribón. nun conozo entá lo que son unes vacaciones de verdá, eso de dir a un llugar y tar ellí dos o tres selmanes de folganza, la folganza sí, y la verdá ye que yá voi teniendo ganes. pos nada que los collacios de vacaciones y yo a sofrir l'uviéu agostín naguando porque llegue san matéu. sicasí esti branu ta siendo bien provechosu en tolos sentíos.
1900 martínez yá acabé