leonor segunda

güei 31 d'ochobre nació la fía de letizia ortiz y felipe borbón, el fechu nun sería noticia de realizase nuna familia convencional (miembros en paro, hipóteques, precariedá llaboral...) de nun ser porque los sos padres son príncipes, empobinaos por nacimientu, y matrimoniu, a la xefatura del reínu d'españa. leonor nun naz con un pan debaxo'l brazu, ye dalgo más d'una barra medio, leo naz con una previsible reforma de la sacrosanta, y sacroconsensuada, constitución del 78 pa qu'asina pueda ser reina, en casu de que vaya tener dalgún hermanu.el ferreteru entiende que la monarquía ye dalgo absolutamente anacrónicu y desfasáu y poro considera que la so abolición ye un fin social, pero mientras hayamos de la soportarhai qu'esixíi-y una conservación plena de les sos tradiciones. lo mesmo que'l ferreteru s'opuso a la boda de felipe con letizia, al entender que la mesma desvirtuaba a la institución monárquica, la propuesta de reforma de la constitución pa facilitar la llegada al tronu español de leonor ye un ataque pergrave a les tradiciones seculares de la monarquía.

la convocatoria d'un referendum sobre la eliminación de la preeminencia de la llinia masculina, sobre la femenina, na herencia de la xefatura del estáu ye en sí mesma una burlla si nun ta acompañada pola cuestión repúblicana. esto ye que nun sería aceptable una consulta popular, nel estáu español non vinculante, sobre la sucesión del tronu si nun s'entruga sobre la eliminación de la monarquía, por supuestu non físicamente, y la restauración del réxime repúblicanu y democráticu fináu en 1939.
el ferreteru piensa que lo meyor que-y pueda pasar a esta neña, qu'acaba nacer, ye poder vivir como una ciudadana, con tolos derechos y obligaciones. ser una persona normal, dalguién más.
el ferreteru alcórdose al saber del nataliciu del proble froilán, persona que de tar como quieren facer agora habría ser l'heriede de los "derechos" dinásticos. quien sabe si conociendo a los españoles nun se monta una facción de sofitu al infante don froilán...como sucesor llexítimu de la corona. pero esto, como ta claro, ye una coña.
letizia, la nuesa conciudadana, yá cumplió'l so papel de concubina; lléga-y agora una etapa de bona vida na corte, atendiendo milenta obligaciones sociales y fotoreportaxes del hola y del qué me dices. tóca-y esperar dieciocho años, cuntando con que nun muerran nin el so suegru nin el so home, pa evitar ser reina rexente.
leonor ii, infanta y grande d'españa solo por nacer nuna determinada familia, los tos súbditos arrodíllense ante ti, los y les que creemos na igualdá de la ciudadanía queremos que sías como nos, repúblicana.
salú y ciudadanía camarada.
y nun se llamó covadonga, tampoco pelayo, nin urraca (como'l ferreteru quería)... llamóse leonor. d'aquitania, de castiella...futura reina de xerusalén ente otros munchísimos títulos que va tener.
pa felicitar lo meyor ye siguir col web de covadonga de borbón.

entruga

por qué pa parir ,a la persona que según la constitución va ser la máxima responsable del sistema públicu, letizia nun va a la sanidá pública?

sía lo que sía

dame igual lo que vayan tener letizia y felipe, alégrome por ellos porque van tener un fiu o una fia, pero sía lo que sía si xefe/a d'estáu quier ser poles urnes habrá pasar.
viva la república

nigeria

mientres que cientos, quien sabe si miles, de compatriotes buscaben un futuru meyor n'europa, una gran parte na casa de campo de madrid, la muyer del presidente de nigeria morría víctima, non de la fame, nin de disparos de la policía d'emigración, sinon d'una operación de ciruxía estética.

el gastu n'educación nesti país ye del 0,7%, el militar del 11%. 6 de cada 100 nixerianos pueden lleer esti blog, pero como'l 30% de la población ye analfabeta pasarán los 51 años de media de vida, y nun van saber nunca nin qu'esistiera, amás 78 de cada 1000 neños que nacen muerren d'aquella. la llei islámica, la sahria, ta vixente, como n'iraq. los derechos de la muyer dependen de la interpretación, siempre estricta pa con elles, de la llei y poro nun tienen derechos, pero la muyer del presidente morrió en marbella n'operación de ciruxía estética, probe muyer.
santiago segura ya tien guión pa "torrente iv operación estética, marbella nigeria oil"

usu de ferreteru

cuestión de derechos

el sábadu día 5 de payares les cais d'uviéu van volver vese enllenes por una marea que nun va festexar trunfu deportivu nin embarazu real, les cais d'uviéu van enllenase de xente glayando por tener derechos, los que reconoz la constitución española y los que la so falta denuncien organismos de la unión europea, asina como la mayoría de la población asturiana. y ye que l'anormal situación llegal del idioma asturianu, y del gallegu-asturianu, nun atiende nin a los preceptos constitucionales, nin a normatives y directives de la ue, nin por supuestu a la voluntá del pueblu asturianu de que la so llingua sía una más, sólo una más.

la oficialidá de la llingua asturiana, que tantu mieu paez que provoca ente determinaos sectores más preocupaos por mantener esti apartheid llingüísticu que n'entamar a solucionar los problemes del país, nun significa más que la igualdá de fechu ente les comunidaes llingüístiques d'asturies, sólo eso más nada, entós por qué tantu mieu a esta midía? por qué tantu mieu a que seamos iguales?
reconocer oficialmente a la llingua asturiana ye reconocer la esistencia d'una comunidá llingüística diferente a la castellana n'asturies, non la reconocer ye siguir negando derechos a casi la mitá de la población.
reconocer la llingua asturiana ye dotala de preseos y recursos pa que siga viviendo y nun se cumplan les alvertencies d'unesco sobre la desapaición del asturianu nos próximos 50 años. reconocela ye un gabitu, imprescindible, pa que'l pueblu asturianu siga siendo asturianu, ye esa la nuesa marca d'identidá; la que mos diferencia, pero sobre too mos axunta colos pueblos que falen les llingües que vienen del llatín, colos que compartimos una base común que nun podemos nin debemos renunciar.
el gobiernu del bloque por asturies, izquierda xunida y federación socialista asturiana continuando la tradición "democrática" de los gobiernos autónomicos asturianos sigue ensin dar pasos conducentes a la normaliazación de la llingua asturiana aplicando medíes desenvueltes n'otres comunidaes llingüístiques de la rodiada, sinon que lo qu'intenta ye buscar la via asturiana a la sobrevivencia de la llingua mediante la innovación. una via que nun contempla la oficialidá de la mesma (anormal nel estáu español), una via na que les lleis que s'apreben nun tienen valir al nun tar reconocía como oficial... en fin una via dientro d'un tunel ensin salida.
alcordase d'aquellos que dicíen que nun diben participar nun gobiernu que nun reconociera la oficialidá de la llingua asturiana nun ye difícil, tan agora. sicasí más qu'alcordamos vamos mirar pal futuru, nun futuru n'asturianu y n'igualdá ente los y les ciudadanes d'esti país que se llama asturies.
puxa l'asturianu.
puxa asturies.

pp da-yos ales

depués d'escuchar les pallabres de dellos dirixentes del partíu de la derecha española, acasu esiste otru?, nun mos pueden estrañar los actos y aiciones contra persones de la izquierda histórica, güei tocó-y a carrillo, eurocomunista, na universidá autónoma de madrid, va un tiempu foi nuna llibrería, ayer nel blog d'eduardo haro los mensaxes qu'atentaben contra la so memoria campaben pidiendo la muerte de delles persones de la izquierda.

en menos de dos meses entama 2006, l'añu del 70 aniversariu del golpe d'estáu, contra'l gobiernu democrátricu, y del entamu de la guerra civil española, añu nel que l'estáu español retrocedía nueve años, nos derechos, y parába la so evolución cívica y social. añu nel que la derecha que nun aceptaba'l resultáu d'unes elecciones llibres y democrátiques promovió un golpe d'estáu, y darréu un xenocidiu de cientos de miles de persones, solo pola so ideoloxía. la primera echáronla abaxo colos caballos, la segunda los fusiles y la monarquía democrática d'anguaño cómo la van echar abaxo?
el pp, el que recibe los votos de los que siguen creyendo que ye un trunfu echar a los gobiernos democráticos pola fuerza, nun sólo nun fae nada por iguar esta situación, sinon que la fomenta mediante la creación d'espexismos de fueos onde nun esisten. como exemplu la falta de respetu d'esi partíu hacia les decisiones de los parlamentos vascu y catalán, na reforma de los sos estatutos d'autonomía, la falta de vergoña a la hora de culpabilizar al gobiernu español de los 11 muertos nel incendiu de castilla la mancha... y ye que como dicía'l presidente español, sr rodríguez zapatero, al llider, supuestamente, del pp y de la derecha española -usted se habrá quedado sin discurso y sin proyecto, porque nunca lo ha tenido-.
lo que más me manca ye que tengo amigos que militen nesi partíu. y que naide piense que toi diciendo que nel pp nun hai xente que sía democrata, hailos y hailes, pero'l populismu esencialista que tan faciendo nun mos puede llevar a bon puertu.

adios mayestru

hai unos años, de la qu'empicipié a lleer el país davezu, cuando llegaba a la sección d'espectáculos y televisión entamé a lleer una columna que nunca supe porque taba ellí puesta, nun falaba nin de la televisión nin d'arte, falaba de política. dende un radicalismu republicanu, con tolo qu'implica ser y vivir como ciudadanu, don eduardo facía crítiques constructives a aquelles coses del mundu que pensaba que necesitaben d'un cambiu. motor de pensamientu cívicu don eduardo lluchó pola igualdá de los y les ciudadanes, lluchó por recuperar la memoria escaecida nesa amnesía que llamen transición. don eduardo lluchaba, cola pallabra, por cambiar esta sociedá, por despertala d'esa hipnosis na que s'alcuentra, despertará agora qué elli yá nun ta?

p'acabar unes lletres d'un de los sos artículos
salen los del pp y piden romper con cuba, suspender la ayuda -médic, alimentaria-; sale solana y dice que, si más tuviera, más enviaría. va habiendo datos diferenciales. la oposición años disimulando, moderándose, fingiéndose a la izquierda del psoe (que no es difícil) y, de pronto, por la curva de resultados de las legislativas hacia las europeas, se destapan y sueltan el consrvadurismo: el color de miami o del vaticano, doctrinas homogéneas. creen que ganan ellos porque el socialismo ¿es de izquierdas! que les favorece su querencia a la caverna.

eduardo haro tecglen

la so páxina

alvertencia

memories d'un ferreteru va evolucionar a otru formatu, qu'anque conserve l'apariencia de blog, que conservando la ¿orixinalidá? de les entraes sía más calmáu y sobre too posao nel intre de facer los analisis d'aquelles coses, grandes o piquiñines, que pasen y por dalguna razón causen una impresión, sobre la que sentimos la necesidá d'espresanos per mediu de la pallabra escrita. tamién vamos avanzar nel tarrén gráficu, más imáxenes implicarán dafechu mayor entendimientu de lo que se quier dicir, tamién van significar una mayor reflexón más que nunca necesaria nestos momentos históricos onde nada ta claro y el futuru ye dalgo no que los suaños conviértense en pesadilles.
o igual facemos pa que'l futuru sía de nueso, y cuando falo de futuru viénenme les pallabres del presidente allende qu'escribo darréu

sigan ustedes sabiendo que, mucho más temprano que tarde, se abrirán las grandes alamedas por donde pase el hombre libre, para construir una sociedad mejor.

¡viva chile, viva el pueblo, vivan los trabajadores!

asina qu'hasta la vuelta... besos y abrazos.

quincuaxésimu quintu día

agradezo a los collacios d'asturies.com la so velocidá n'iguar la falta de memoria del ferreteru, agora pa lleer memories d'un ferreteru va poder facese dende les siguientes direcciones, que como los caminos van a roma, www.ferreteru.blogspot.com, www.ferreteru2.blogspot.com, www.ferreteru.tk., que son unes cuantes pa soportar unos llibros inlliables les más de les veces.
0356 el ruidu del agua me despierta. subo la persiana pa ver llover, ye una cosa perguapa, la tierra güel a humedá y el calor acumuláu del branu (tamién de la primavera) evapórase formando ñubes de niebla que faen de la ciudá dalgo enforma apaecío a la city.
0405 depués de momentos tan románticos vuelvo al racionalismu estrictu y entro na cama, arrópome y prendo la radio pa nun escuchar, nin sentir, nada.
0646 suena'l primer despertador. subo'l volume de la radio, que como siempres quedara encesa, y siento les noticies d'asturies el tresporte sigue de fuelga, los tresportistes del estáu español van axuntase a los asturianos pa conseguir meyores condiciones de trabayu. alsa yá nun ye de l.luarca ye británica, según paez y cuenten la operación consiste en que los cosmen se faigan nos primeros accionistes de la national express, anque sía la national express la que pague por una compañía deficitaria que va quedar coles llinies de llatinoamérica y china.
0705 por fin salgo de la cama, casi tolos díes pienso en porqué paso venti minutos ensin facer nada intentando llevantame cuando lo más fácil sedría poner un solu despertador a les 0705 pero nada ún que ye un maniáticu y quier ser raru.
0728 llueve munchísimo, decido perder un bon día pa llavar la moto y voi en national express, ye'l mio primer viaxe nun autobús británicu, taba nerviosu pregunté-y a un señor si ellí paraba'l national pa dir a silvota y miróme con cara de sustu pensando en que tipu yera aquel de pantalón d'obra que-y falaba d'un national que diba pa los polígonos, pero bono tamién el día yera raru.
0758 entramos.
1300 salimos, nun hai novedá. hai fuelga y nun entren palets.
1501 sí un minutu más tarde, entramos.
1931 salimos, compensé'l minutu.

ayer matáronme a la mosquita que tenía en cuartu, voi echala en falta, anque apelando a la mio memoria de pexe cuando acabe d'escribir esto yá pasara l'escaezu.
besos y abrazos.

la cabra paecía tar meyor alimentada.

quincuaxésimu cuartu día

otru llunes más. otra selmana más a restar del total de les selmanes que tien el contratu de duración.

0130 toi suañando que toi en trabayu, llevántome a escures y voi pa onde la tele, cola intención de movela, como la lluz nun ta prendía enciendo la tele, la mesma que voi mover, pa ver un poco; depués de decatame de que sólo taba col pesadiel.lu vuelvo pa la cama.
0646 suena l'alarma. prendo la radio y escucho? les noticies d'asturies. dicen qu'hai fuelga de tresportistes y que va llover.
0705 llevántome. llevo la radio, como davezu, al bañu pa resintir les anuncies mientres me llavo.
0728 acabé, toi vestíu y almorzáu, batí un record. voi pola moto, tengo que la llavar enantes yera azul y anguaño yá tien más gris qu'azul, nun sé si pasaré la itv.
0744 paro na gasolinera y compro l'agua, nun sé porque nun me da por mercalo o encargalo'l día enantes y asina aforrar unos cuantos centimos.
0747 soi rápidu. llego'l primeru a la nave.
0900 como si sientiere les campanaes del reló de la escandalera acabo de facer lo de tolos díes. hai fuelga de tresporte pa esixir la supresión del peaxe de l'autopista del güerna y la desapaición del impuestu indirectu sobre'l combustible que graciosamente mos concedió'l gobiernu progresista del señor areces, enantes de que se fixere'l pactu de la esquierda plural, p'asina facer frente a una mala negociación del trespasu de la sanidá pública.
0930 asturies, cola escepción obvia de les islles canaries y balears, melilla, ceuta y perexil ye la única parte, de les anguaño integrantes, de la corona española dende la que pa dir a españa hai que pagar por usar l'autopista, colo qu'ello supón. esto ye una auténtica contradicción col sistema de neolliberal que defende, económicamente, el gobiernu areces. asturies tien d'averase a otros centros económicos, facer por supuestu lo posible por ser centru económicu, pero desaniciar la idega, falsa, de que too tien de venir per madrid, habemos aprovechar la ue y averanos a otros países, igual de cercanos, como francia, portugal, iguar estructures marítimes que dean posibilidá de comerciu a los nuesos recursos y la distribución de los de daquellos que nun tienen salida a la mar. tan grande ye la osadía de la fsa-psoe que nes últimes elecciones al parlamentu español el candidatu númberu un por asturies de dicha federación yera una persona que se destacó na so llucha contra la supresión del peaxe, y la xente votólu, y ye que nun sabemos que solo en madrid se podía votar a zapatero? esto ye los y les propies asturianes votaron en contra de los sos propios intereses.
1300 pasa rápida la mañana, vien dalguna caxa, poca cosa. salgo que tengo fame y ganes de pigazu.
1500 vuelvo pensando en que'l miércoles ye'l día de la raza, perdón día de la hispanidá, y nun hai que venir a trabayar. comentábanme ayer que se taba faciendo un conceyu de preparación d'una manifestación d'exaltación de la raza y que pa la ocasión vinieren representantes de los latin king, los ñetas, maras, falange, democracia nacional, españa 2000 pa cellebrar data tan siñalada. el casu ye qu'esta reunión, que bien podría tar autorizada pol delegáu del gobiernu español n'asturies, algamóse la decisión de que la meyor forma d'atestiguar la supremacía racial hispana nun yera otra más que la d'entamar un combate de vale tuto, o como quiera dios que na gloria tea, ente ellos.
1600 la cabra de la lexón va dir al desfile. nunca tuvi cabres pero vi munches y he dicir que nenguna tan famélica y ruina como la de los lexonarios españoles. y los y les madrilanos aplauden al pasu de les tropes de la victoria nos campos de perexil, de bailen y de teruel, enorgullécense al ver la banderona rojigualda y sienten emoción al sintir un himnu que, al contrariu que los demás, nun tien lletra y pa encima hai que pagar los derechos d'autor a los herederos del creador de la obra. eso sí los militares españoles dannos les gracies, nun sabemos por qué pero bono de bona xente ye ser agradecíos anque en casu de victoria democrática na que se deicidiera la soberanía de dalguna parte de la corona respectu del restu l'exércitu español entraría en combate al mandatu de la constitución democrática.
1930 pasa la tarde ensin novedá. perdí un torniellu. acabóse'l mio celibatu, dende va dos selmanes tengo'l gustu de convivir con una mosquita que ronda pel mio cuartu toles nueches queriéndome facer chupetones, la verdá ye que toi garrando-y preste.

sometimes i fell so happy, sometimes i feel so sad

aniversariu

revolución proletaria asturiana ochobre 1934.
uhp

quincuaxésimu tercer día

enantes d'entamar: pa facer más cenciella la entrada al blog púnsose en funcionamientu la dirección www.ferreteru.tk a, sicasí la de siempres va siguir operativa hasta que mos despidan. salú

0703 la ser da anuncia de la xornada en defensa del estáu del bienestar na república francesa. el ferreteru ciégase de la envidia, por qué siempre tienen que ser los y les ciudadanes franceses los y les primeres en casi too?
0738 salgo de casa, abrígome munchísimo, porque fae munchísimo frio, pienso nel friu oficial que tanto repetíen los profesores d'institutu.
0756 entramos, sí cuatro minutos enantes de la hora, el xefe venía acelerando como si lu llevaren los demonios.
0858 acabo facer les xeres programaes davezu; entamo cola revisión rutinaria. miro pa les rexes que guarden, o separten la propiedá, alcuérdome de los de seguridá que taben lleendo'l periódicu.
1000 fuelga en francia en defensa del estáu del bienestar. la clase obrera francesa llevantóse contra les medíes neolliberales conducentes a la reducción del estáu del bienestar, pola eliminación del estáu como axente regulador de les relaciones ente persones físiques y xurídiques como bien escribe chomsky. nel estáu español, paradigma de la ignorancia esterior, la población, los y les súbdites del rei suxetu a les decisiones del congresu de los diputaos, vive feliz por tener asistencia sanitaria (anque non odontoloxía los aparatos tienes que los pagar, oculistes les gafes has pagales, psicolóxica...) y una rede d'educación pública subsidiaria y receptora de lo que les empreses privaes ya ilesia nun quieren, salarios que nun se cuerresponden col coste de vida, y eso sí al final una pensión y melicines de baldre, poco más. faennos pensar, y creer, que l'estáu del bienestar llimítase a les atenciones sanitaries y pensiones cuando la idega del estáu del bienestar ye enforma más amplia y desenrollada, como exemplu ta'l de los países nórdicos onde la ciudadanía ta dalcuerdu en pagar más impuestos si ello mantién l'estáu del bienestar que gocen, equí una subida d'impuestos (inclusu nel casu de que se restrinxere a les rentes más altes diba venir acompañada por protestes y sartenes recien estrenaes enfrente les sedes públiques). lo que ta pasando en francia, alemaña, llegará al reinu d'españa, cola diferencia de que n'alemaña y francia la población quedará colo qu'anguaño los españoles tán tan contentísimos de tener y equí reduciráse y volveremos a les mutues empresariales d'asistencia.
1130 sigue faciendo muchísimo friu, toi col xersei y el forru, amás del buff (que coses estes d'emplegar el nome comercial pa nun dicir braga) pa nun me costipar. si tuviere nel institutu yá taríemos de fuelga, como en francia, que ye eso de tar a 12 graos y nun tener calefacción. los polígonos paécense a la estepa soviética, llanures inmenses onde lo único que resalta nel paixase son les naves y onde pues pasar hores ensin ver a naide caminando, y sobre too son frios, muncho. si tuvieremos en clase, dicía, yá tariémos de fuelga y como siempres el director respondería qu'hasta l'un de payares la calefacción nun se pon; l'un de payares amás de ser el día de difuntos ye l'entamu del friu oficial nel reinu d'españa y les calderes de los centros públicos pónense a furrular. la dulda surdía cuando dalguién dicía que qué facíen en teruel o en soria llugares onde'l frio entamaba inda más ceo que nel norte y el director nun sabía que mos retrucar, bono al final marchábemos pal llanes, onde tampoco teníen calefacción y tomábemos un café cuando había perres y veíemos la película del plus hasta la hora de volver pa casa. pero nel institutu seguíen ensin calefacción. hai que dicir que les fuelgues pola falta de calefacción teníen un sofitu democráticu aplastante pero al nun cuntar col sofitu de los piquetes informativos nun teníen l'asistencia correspondiente polo que s'adelantaba materia (relativamente).
1301 un minutu más tarde, pa contentar a la patronal, voi pa casa que yá tengo fame y esto de pensar como que despierta les célules dixestives. de la que toi na moto pienso en porque ovidio y tini nun dicen, nin posiblemente digan nada de la desapaición del estáu del bienestar, y ye que l'estatutu de catalunya ye una cosa que tien que los tener preocupadísimos polo que tan diciendo.
1457 entramos. saco los palés que recoyera pa dir a xintar y siguimos cola xera.
1600 alcuérdome de la que tenía que pasar per dalguna conseyería y tener qu'amuesar el mio documentu oficial d'identidá a un personaxe d'uniforme perteneciente a una empresa privada, esti apuntaba los mios datos nun llibru de visites y depués d'observame déxabame pasar entrugándome si sabía llegar. el gobiernu del principáu d'asturies nun tien cuerpu de policía propiu y poro depende de la seguridá privada pa defender? lo público. nun tengo nada contra los 'securatas' pero que queréis que vos diga, una persona con unes oposiciones y una especialización siempre me va dar más seguridá, y respetu tamién, qu'otra que recibiera la llicencia d'armes en tres minutos. la reducción de la participación del estáu, de la so necesaria intervención, llegaba a llímites estremos cuando dalgún ministru de l'antigua alianza popular, güei partíu popular, proponía que los campamentos militares españoles tuvieren vixilaos por empreses privaes, colo qu'a la fin l'artículu 8 de la ce tendría que dicir que amás les empreses de seguridá privada habrán velar pola vida de los integrantes de les fuerces armaes, bono en fin que un desastre. les cárceles, pa qué son?, d'eeuu, ru, agora portugal tan siendo privatizaes, criterios de mercáu pa alixerar les cargues del estáu, reducciones nes tarées conducentes a la reinserción y esplotación llaboral p'asina sufragar los gastos del encarcelamientu. y ye que les polítiques paecen cada menos polítiques. claro qué si echamos cuentes ye muncho más barato pagar a empreses que depués malpaguen y incumplan los derechos que tener que ser l'estáu quien abone esos gastos polos que toos y toes pagamos.



cuando vuelvo a casa siento que'l pp, antigua ap, va salir a evanxelizar a la población sobre los males que va trayer l'estatutu de catalunya, el xefe del estáu mayor diz que l'exércitu va garantizar la indivisibilidá de la patria, ibarra diciendo que d'estutu asina nada, y yo m'entrugo pa qué votó'l pueblu catalán?

bucles

posiblemente lo meyor sería que lo llamara bises musicales pero préstame más la pallabra bucle, que deprendiera allá pelos entamos de los 80 de la que taba de moda programar en basic y eses coses que n'aquella dómina taben tan de moda y que dicíen que diben ser la solución pa los nuesos futuros devenires profesionales. d'aquella tou dios tenía un amstrad o un spectrum, tener un msx yera una esperiencia diferente, una máquina compatible con dos, con cartuchos, disqueteres de verdá y eses coses, pero esto nun tien nada que ver cola música.

mañana cuando despierte estaré lejos de aquí, bono a tres quilómetros, y entamaré una sórdida sesión de música comercial na que los temes repítense como l'allu. díxelo más veces que yera d'agredecer sentir música de la que tas trabayando pero por favor ordenadores que controlais los filos músicales cambiái la programación y nun pongais el mesmu cantar cuatro vegaes na mesma hora.
y esto dizlo una persona que agora mesmo en winamp tien una llista de reproducción d'un solu tema que ye'l maggi may de rod stewart y que va pasar sintiéndolu más d'una hora. pero ye como si mos ponemos a escuchar un discu de rock progresivu, thick as a brick por exemplu de jethro tull, y tamos hores y hores escuchándolu, disfrutamos de la música y buscamos significaos.
melendi, que ye un tipo que se pon col xicolate (dizlo elli poro nun toi difamando nin nada que se paeza), tien agora un single nel que diz qu'alcontró la canción y casó cola musa; tamién tien entrevistes onde diz que nunca nun lleera un llibru, y un exdirector d'institutu que diz que perellí nun pasaba, lo que tampoco ye escusa como pa que los productores nun se dean cuenta de que les muses dante la inspiración y nun te puedes casar con elles. pero nun pasa nada porque'l rapaz ye asturianu y fexo hasta un cantar que desplazó, pa siempre?, el poema de pedro garfias (republicanu, exiliáu en méxico) musicáu por victor el nuesu que valía d'apañu pa nun entonar la lletra del asturies patria querida.
fernando alonso premiu príncipe d'asturies de los deportes, letizia preñada y copresidiendo (o será cosoberando) la ceremonia y melendi entonando'l so voi caminando pela vida, sin pausa pero con prisa... o como sea. esti añu nos premios nin bandes de gaites nin osties aldeanes, esti añu queremos a melendi abriendo'l pasu de la comitiva de los príncipe.
faltos de debate políticu en mitá del desiertu del gobi, asturies nun sabe pa onde va, ovidio y tini tan indignadísimos colo del estatutu de catalunya, javier fernandez que nun ye prioriodá lo del estatutu y ¿jesús iglesias? bono yá sabemos como ye izquierda xunida-bloque por asturies...
un abrazu
diba poner la combinación alfabéticu d'un de los singles de melendi pero paez que pol tema de la piratería y los sos derechos nun me dexa atopar nenguna, asina que evitando a dioses enxicolataos meto la lletra de roxanne de the police que si s'alcuentra de baldre y esos sí que son dioses.

Roxanne

Roxanne
you don't have to put on the red light
those days are over
you don't have to sell you body to the night

Roxanne
you don't have to wear that dress tonight
walk the streets for money
you don't care if it's wrong or if it's right

Roxanne
You don't have to put on the red light

I loved you since I knew you
I wouldn't talk down to you
I have to tell you just how I feel
I won't share you with another boy
I know my mind is made up
so put away your makeup
told you once I won't tell you again

It's a bad way
Roxanne
you don't have to put on the red light
Roxanne
you don't have to put on the red light

in memorian

quincuaxésimu segundu día

la entrada tardó en ser fecha, windows colgóse. nun quiero más windows.

la páxina de microsoft ye mui rara, tien programes pa que sepa si la to versión del office o windows ye orixinal o non. si nun ye orixinal entiéndese que ye pirata y nun la puedes usar, habrá xente tan estulta como pa usar eses "utilísimes" ferramientes?
el ferreteru nun usa programes de microsoft menos, y per poco tiempo, el sistema operativu tolo demás dende messenger a office ye con programes de llicencia gnu.
la entrada de güei llegará mañana.
besos y lo siento enforma.